XƏBƏRLƏR
-
Azərbaycan kubokunun 1/16 final mərhələsinin püşkü atılacaq
Yanvarın 23-də Azərbaycan kubokunun 1/16 final mərhələsinin püşkatma mərasimi keçiriləcək. Bakı İdman Sarayının Konfrans otağında baş tutacaq tədbir saat 11:30-da başlayacaq. Bu mərhələdə 32 komanda iştirak edəcək. Onlardan 10-u Yüksək Liqanın təmsilçisidir. Qalan iştirakçılardan 7-si Birinci, 13-ü isə İkinci Liqa iştirakçılarıdır. Daha 2 komanda Naxçıvan Futzal Liqasında çıxış edən kollektivlərdir.
-
Bu gün 20:00: Azərbaycan – Özbəkistan
Azərbaycan milli komandası bu gün yoldaşlıq oyunu keçirəcək. Komandamız saat 20:00-da Bakı İdman Sarayında Özbəkistan futzalçıları ilə qarşılaşacaq. Oyunu Hikmət Qafarlı, Anar Fərəcov və Rahin Heybətovdan ibarət hakimlər briqadası idarə edəcək.
-
Rəqib hazırlığa başlayıb
DÇ-2020-nin elit-raund mərhələsində millimizlə bir qrupda yer alan Rusiya yığması təlim-məşq toplanışına başlayıb. Yanvarın 20-də Moskvada bir araya gələn rəqibimiz Xorvatiyaya yanvarın 28-də yollanacaq. Baş məşqçi Sergey Skoroviç bu futzalçılara dəvət göndərib:
-
Millinin oyunlarına hakim təyinatı
DÇ-2020-nin elit-raunda mübarizə aparacaq Azərbaycan millisinin oyunlarına hakim təyinatları açıqlanıb. Xorvatiyanın Osiek şəhərindəki “Qradsk vrt Arena”da millimizin iştirkı ilə keçiriləcək ilk iki oyunu İtaliyadan olan hakimlər idarə edəcək:
-
20 Yanvar – Ümumxalq Hüzn Günüdür
-
Cavab oyunları keçirilib
Bu gün keçirilmiş 10 oyunla Azərbaycan kubokunun 1/32 final mərhələsinin cavab oyunlarına yekun vurulub. 20 Yanvar - Ümumxalq Hüzn Günü ilə əlaqədar şəhidlərin ölməz xatirəsinə ehtiram əlaməti olaraq 1 dəqiqəlik sükut elan olunub.
Qarşılaşmalara gəldikdə, “Gənclik” cavab oyununda da qələbə qazandı. Düzdü, U-19 oyuna daha istəklə və inamla başlamışdı. Ancaq Şahmar Cəfərovun qırmızı vərəqə alması vəziyyəti gərginləşdirdi. Ridan Babayev də meydanı erkən tərk edənlərdən oldu. Nəticədə üstünlüyünü artıran “Gənclik” İK bu dəfə böyükhesablı qələbə qazandı.
İkinci oyun daha gərgin və dramatik alındı. “Xızı Yasamal” birinci hissənin ortalarında hesabı 5:0-a çatdırsa da, “Bibi-Heybət”in geridönüş etməsinə mane ola bilmədi. Yekunda 5:5 hesabı qeydə alındı. Rəqib meydanında daha çox qol vurduğuna görə, İkinci Liqa təmsilçisi mərhələ adlayan tərəf oldu. “Borçalı” isə cavab oyununda daha çox qol vurmaqla ümumilikdə 26:3 hesablı qələbəyə sevindi.
AzMİU – “Baker Hughes” dueli isə sona 4 saniyə qalmış dayandırıldı. Buna səbəb universitet komandasının heyətində yetərsayın olmamasıdır. Belə ki, AzMİU komandasının 3 oyunçusu qırmızı vərəqə aldığına görə, hakimlər görüşü dayandırdı. Nəticə ilə bağlı İntizam Komitəsi qərar verəcək.
Günün maraqlı qarşılaşmalarından biri ADBTİA və “Baker Tilly” komandaları arasında keçirildi. İlk oyunda İkinci Liqa komandası 4:1 hesablı qələbə qazanmışdı. Buna görə də Birinci Liqa klubuna 3:0 hesablı qələbə lazım idi ki, elə ilk qolu da Namiq Quliyevin yetirmələri vurdu. Ancaq rəqibin səhvlərini bağışlamayan “Baker Tilly” fasiləyə qədər ardıcıl 2 qol vurdu. Bundan sonrakı dəqiqlərdə ADBTİA-ya mərhələ adlamaq üçün ən azı 5 qol vurmaq və ya 4 top fərqi ilə qələbə qazanmaq gərəkirdi ki, “idmançılar” bunu nəyinki bacardı, əksinə, “Baker Tilly”in fərqi artırmasına mane ola bilmədi. Onu da qeyd edək ki, ADBTİA-nın əsas oyunçularından Comərd Baxşəliyev zədələnərək görüşün yarımçıq tərk etdi.
Maraqla gözlənilən öz liqalarının liderlərinin duelinə “AjaxBaku” itiki ilə çıxmışdı. Kapitan Eşqin Tağıyev ilk oyunda qırmızı vərəqə aldığına görə, bu dəfə meydana çıxmamışdı. Hesabı Nicat Qafarlı açdı. Ancaq “AjaxBaku” tezliklə status-kvonu bərpa etdi. Əsgər Hümbətov fərqləndi. NTD növbəti dəfə hesabı lehinə dəyişdi. Bu dəfə Zakir Kərimov adını tabloya yazdırdı. Təmraz Əmircanov 10 metrlik zərbəni dəqiq yerinə yetirməklə yenidən hesaba tarazlıq gətirdi. “AjaxBaku”nu oyunda ilk dəfə önə keçirən qolu da Əmircanov vurdu. Di gəl, Mirmehdi Rzayev tezliklə bərabərliyi təmin etdi. Sonrakı dəqiqlərdə NTD 3 qol vuraraq mərhələ adlayan tərəf oldu.
İlk oyunda hərəyə 8 qol vuran komandaların duelində isə “Zəngilan” sevindi. Fasiləyə qədər avtoqol sayəsində hesabda önə keçən Birinci Liqa iştirakçısı ikinci hissədə üstünlüyünü artırmağı bacardı.
3:3 hesablı heç-heçənin revanşında isə “Forza Neftçi” qələbə qazandı. “Advokat” da çətinliklə üzləşmədi və ötən mövsümün finalçısı mübarizəni davam etdirmək hüququ qazandı. Bu mərhələnin son matçında qələbə sevincini “Standard” yaşadı. Birinci Liqanın iddialı təmsilçisi birinci oyundakı üstünlüyünü bu dəfə də davam etdirdi.
Beləliklə, “Dalğa”, “Yurd” MFK, “Hövsan”, “Altay”, “Baku Fans”, “Yasamal” İSK-2, “Star karqo”, “Atletiko Baku”, “Star karqo-2”, “Red Line”, “Gənclik” İK, “Bibi-Heybət”, “Borçalı”, “Baker Tilly”, NTD, “Zəngilan, “Forza Neftçi”, “Advokat” və “Standard” komandası 1/16 finala vəsiqə qazanıb. AzMİU – Baker Hughes görüşü ilə bağlı İntizam komitəsi qərar qəbul edəcək. Qeyd edək ki, bu komandalar arasında keçirilmiş ilk oyunda “Baker Hughes” 5:3 hesabı ilə qalib gəlib.
-
Kubok oyunlarında 1 dəqiqəlik sükut
-
“Yasamal” İSK-2, “Star karqo”, “Star karqo-2”, “Atletiko Baku” və “Red Line”....
Bu gün Azərbaycan kubokunun 1/32 final mərhələsinin cavab oyunları çərçivəsində daha 5 matç baş tutdu. Günün birinci dueli maraqlı alındı. İlk oyunda minimalhesablı qələbə qazanan “Baku Fire-3” cavab qarşılaşmasında da hesabı açan tərəf oldu. Ancaq fasiləyə qədər status-kvonu bərpa edən meydan sahibləri ikinci hissədə hesabda önə keçdi. Növbəti dəqiqələrdə qollarının sayını artıran “gənclər” növbəti mərhələyə yüksələn tərəf oldu. “Star karqo” – “Zülfüqar” dueli isə komandaların qarşılıqlı qolları ilə davam etdir. Hər dəfə “Star karqo” hesabda önə keçməklə mərhələ adlamağa yaxın olsa da, rəqib qarşılıq verməklə duelin yekununu xeyrinə dəyişirdi. Ancaq Mahir Əliyevin son dəqiqədəki qolu cütün taleyini həll etdi. İki oyunun ümumi nəticəsində bərabərlik qeydə alınsa da, Birinci Liqa təmsilçisi ilk oyun zamanı rəqib meydanında daha çox fərqləndiyinə görə mübarizəni davam etdirən tərəf oldu.
“Atletiko Baku” ikinci oyunu da qalib başa vurdu. Zaur Səmədovun drujinası bu dəfə böyükhesablı qələbə ilə 1/16 finalın qapısını açdı. “Star karqo-2” isə cütün taleyini demək olar, birinci oyunda həll etmişdi. Cavab matçında da rəqibini üstələyən İkinci Liqa təmsilçisi növbəti mərhələyə vəsiqə qazandı.
“Red Line” isə bir həftə əvvəlki matçda 15:1 hesabı ilə qələbə qazandığına görə, cavab görüşünü formallığa çevirmişdi. Bununla belə, Vladislav Ledyayevin komandası yenə qələbə qazanmağı bacardı.
Beləliklə, “Yasamal” İSK-2, “Star karqo”, “Star karqo-2”, “Atletiko Baku” və “Red Line” 1/16 finalda iştirak edəcək.
