LİQALAR
-
“Marafon” revanş aldı, “dördlüyə” yüksəldi
Bu gün Yüksək Liqada X turun oyunları keçirildi. İkinci dövrənin ilk oyununda lider “Araz”la “Baku Fire” üz-üzə gəldi. Bu komandalar arasında keçirilmiş görüşdə “Araz” 4:1 hesablı qələbə qazansa da, debütant təcrübəli rəqibinə kifayət qədər həyəcanlı dəqiqələr yaşatmışdı. Bu dəfə isə hesab erkən açıldı. Hadi Ahmadi qapıçının təcrübəsizliyindən yararlandı. Ardınca “Araz”ın digər Hadisi qol sevinci yaşadı. Düzdü, nominal meydan sahibləri Rauf Rüstəmovla fərqi minimuma endirdi. Di gəl, Murilo yenidən rəqib torunu silkələməklə 2 toplu fərqi bərpa etdi. Buna qədər Rasif Səfiyarov status-kvonu bərpa etmək şansını qaçırdı. Fasiləyə qədər “Araz” fərqi bir qədər də artırdı. Yeri gəlmişkən, zədə üzündən Rizvan Fərzəliyev və Ramiz Çovdarov “Araz”a kömək edə bilmirdi. İkinci hissədə də komandalar hərəyə birinci hissədəki qədər qol vurdu.
Turun mərkəzi oyununda “ilk 4-lüy”ə iddialı “Neftçi” və “Marafon” komandaları üz-üzə gəldi. CBC Sport televiziya kanalı vasitəsilə canlı yayımlanan görüşdə “Neftçi” cəzalı Rüfət Balakişiyevin və zədəli Elnur Zamanovun xidmətindən yararlana bilmirdi. “Marafon” isə Sadiq Cavidin yoxluğunu Aleksandr Dovqanla doldurmuşdu. İlk təhlükəli hücumu “Marafon” yaratdı. Seymur Məmmədovun zərbəsindən sonra top dirəyə dəyib geri qayıtdı. Ancaq 3-cü dəqiqədə pressinq tətbiq etməklə topu ələ keçirən nominal qonaqlar Borisovla hesabı açdı. Az sonra Məmmədov iki oyunçudan sıyrılıb qapıçı ilə üzbəüz qalsa da, yenə şansını qaçırdı. Elə rəqib “cəbhə”dən Kənan Manafov da “çərçivə”yə düşə bilmədi. Ardınca Baxşəlizadə Həsənzadəni məğlub edə bilmədi. Epizodların birində Oruc Tofiq Mikayılovun zərbəsindən sonra topu qapı xəttindən çıxardı. Fasiləyə 15 saniyə qalmış Borisov 10 metrlik zərbəni dəqiq yerinə yetirməklə fərqi 2 top çatdırdı. İkinci hissəyə nominal meydan sahibləri qolla başladı. Emil Həsənzadə fərqi minimuma endirməklə intiriqanı da artırdı. Ancaq Abdullazadənin yetirmələri 34-cü dəqiqədə yenidən rəqibin fərqlənməsinə üzüldü. Bu dəfə Məstiyev rəqib torunu silkələdi. Yekunda 3:1 hesabı ilə qalib gələn “Marafon” I dövrədəki yenilginin də revanşını almış oldu.
EKOL - “Premier” duelində favorit qələbə qazandı. Hərçənd debütant təcrübəli rəqibinə kifayət qədər müqavimət göstərməyi bacardı.
Növbəti oyun nominal qonaqların məhsuldarlığı ilə yadda qaldı. “Tələbələr” fasiləyə qədər 6 cavabsız top vurub. İkinci hissədə rəqibinə cəmi bir dəfə fərqlənmək imkanı verən “Bakı” TFK yekunda böyükhesablı qələbə qazandı.
Turun son oyunu baş tutmayıb. “Xızı Futzal” təyin olunan vaxtda meydana çıxmadığına görə, nəticə ilə bağlı AFFA-nın İntizam Komitəsi qərar verəcək.
-
Təxirə salınmış oyunlar keçiriləcək
İkinci Liqada I və IV turlardan təxirə salınmış AZZERS – “Bibi-Heybət” və NTD – “Advokat” oyunları keçiriləcək. Hər iki matç dekabrın 4-də Olimpik Starda oynanılacaq.
-
NFL: VIII turun oyunları keçirilib
Naxçıvan Futzal Liqasında VIII turun oyunları keçirilib. Nəticələri və turnir cədvəlini diqqətinizə çatdırırıq:
-
CBC Sport-un seçimi
Bu gün Yüksək Liqa X turun oyunları keçiriləcək. CBC Sport bu dəfə “Neftçi” İK – “Marafon” oyununu canlı yayımlayacaq.
-
BL, XIV tur: "Forza Neftçi" - "Standard" (fotoreportaj)
-
“Dalğa” liderə yaxınlaşdı
Bu gün İkinci Liqada XII turun oyunları keçirilib. Daha doğrusu, “Baker Hughes” – “Bibi-Heybət” və NTD – “Emin spor” oyunu baş tutmayıb. Bu dəfə “Baker Hughes” və “Emin spor” təyin olunmuş vaxtda meydana çıxmayıb. Hər iki oyunla bağlı İntizam Komitəsi qərar verəcək. Nəticələrə gəldikdə, “Altay” iddialı “Atletiko Baku”dan güclü olub. “Dalğa” isə uğurlu çıxışını davam etdirir. “Bədr FK Xocalı” – AZZERS qarşılaşması məhsuldarlığı ilə yadda qalıb. “Advokat” qazandığı qələbə sayəsində müvəqqəti də olsa, zirvəyə yüksəlib. Turan “Təbriz”in qələbəsi ilə yekun vurulub.
-
Lideri dəyişən qələbə
Bu gün keçirilmiş 5 oyunlar XIV tura yekun vurulub. Günün ilk oyununda qapı toru cəmi bir dəfə silkələndi. Digər görüşdə isə “Baku Fire-2” böyükhesablı qələbəyə sevindi. “Ulduz” birinci hissədə rəqibinə yenilsə də, fasilədən sonra toparlanmağı və hesabı lehinə çevirməyi bacardı. “Baku Fans” – U-19 oyunu isə birincilərin təyin olunmuş vaxtda meydana çıxmaması üzündən baş tutmayıb. Turun sonuncu, həm də mərkəzi oyunu kifayət qədər maraqlı alındı. Xüsusilə də “Forza Neftçi” fan-klubun üzvləri hazırladıqları pankartlarla və şüarlarla komandalarını qələbəyə səsləyirdilər ki, bu da matça əlavə rəng qatırdı. Hesabı liderin ən yazın izləyicisi açdı. Təcrübəli Həbib Amanov rəqib torunu silkələdi. Növbəti qolun müəllifi isə Emin Quliyev oldu. Nominal qonaqlar fasiləyə qədər daha bir qol vurdu. “Forza Neftçi” ikinci hissəyə qolla başladı. 22-ci dəqiqədə Rəhman Cəfərov fərqi minimuma endirdi. Amma matçda son nöqtəni “Standard” qoydu. Beləliklə, “Forza Neftçi” mövsümdə ilk məğlubiyyətini almaqla yanaşı, liderliyi də əldən verdi. Əvəzində “Standard” “taxt”a yüksəldi.
-
İkinci Liqa, XII tur: Təyinatlar
İkinci Liqada XII turun oyunlarına təyinatlar açıqlanıb. Oyunlar dekabrın 1-də Bakı İdman Sarayında keçiriləcək.
