Bu gün Yüksək Liqada VIII turun oyunları keçirilib. İlk matçda iddialı “Neftçi” “Xızı Futzal”la üz-üzə gəlib. Rüfət Balakişiyev “Neftçi”dən, Qərib İbrahimov isə “Xızı Futzal”dan cəzalı olduğuna görə, meydana çıxmayıb. Oyunda sükut 11-ci dəqiqədə pozulub. Adil İsmayılov “Neftçi”də qol hesabını açıb. Buna bəndimiş kimi növbəti qollar da vurulub. Hacıbala Abdullazadənin yetirmələri fasiləyə qədər 4, rəqib isə cəmi bir qol vurmağı bacarıb. “Xızı Yasamal” ikinci hissədə daha 4 qol vursa da, rəqibin məhsuldarlığına mane ola bilməyib. Yekunda “Neftçi” böyükhesablı qələbə qazanıb.
Turun mərkəzi oyununda turnir cədvəlinin ilk iki pilləsində qərarlaşan komandalar üz-üzə gəlib. CBC Sport-da canlı yayımlanan oyunda ilk təhlükəli vəziyyəti Namiq Məmmədkərimov yaradıb. Amma təcrübəli hücumçunun zərbəsi dirəyə tuş gəlib. Namiqdən fərqli olaraq Çovdarov dəqiq oynayıb və 2-ci dəqiqənin tamamına az qalmış hesabı açıb. Müdafiədə edilmiş səhv baha başa gəlib. 4-cü dəqiqədə Rizvanın qapıya paralel ötürməsini dirəyin yanında dayanan Bağırov tora qovuşdura bilməyib. Növbəti qol 9-ci dəqiqədə vurulub. Bu dəfə Murilo Borges Souza “doqquzluq”u dəqiq nişan alıb. “Araz”ın vurduğu 3-cü qolda rəqib qapıçının səhvi həlledici rol oynayıb. Emin Kürdov topu uzaqlaşdırmaq istəyərkən qarşısında dayanan Xətai Bağırova ötürmə etmiş oldu. Fürsəti qaçırmayan “11 nömrə” fərqi artırdı. Hissənin son dəqiqəsində Çovdarov Kürdovla dueldən məğlub ayrılmaqla dubl etmək şansını da qaçırdı.
Səhvləri ikinci hissədə də təkrarlayan EKOL 22-ci dəqiqədə Emin Kürdovun inamlı oyunu sayəsində fərqin artmasından yayındı. Mehdinin topu itirdiyi epizodda isə İsa qapı istiqamətində zərbə vurmağa imkan tapmadı. 26-cı dəqiqədə isə Xətai növbəti şansını qaçırmaqla komanda yoldaşlarını da təəssüfləndirdi. 2 dəqiqə sonra Rizvan Fərzəliyev topu qapıçıya ötürən zaman Məmmədkərimova düşdü. Kapitanın dabanla ötürməsini həm də baş məşqçisi olan Radik Əhmədov “çərçivə”yə göndərə bilmədi. 33-cü dəqiqədə Samir Həmzəyevin, ardında Radik Əhmədovun qüvvətli zərbələri yaddaqalan oldu. Sona 18 saniyə qalmış Radik Əhmədov10 metrlik zərbəni dəqiq yerinə yetirməklə fərqi 2 top endirdi. Bir sözlə, hər hissədə bir komanda qalib gəlsə də, yekun hesab “Araz”ın xeyrinə oldu.
Növbəti oyunda isə təcrübəli futzalçılardan qurulmuş “Marafon”la debütant “Premier” üz-üzə gəldi. Quba təmsilçisi meydana bu dəfə yeni formada çıxmışdı. Hesabı Asif Zeynalov açdı. 10-cu dəqiqədə isə “Premier” “3-ün 1-ə” mübarizədə hesabı bərabərləşdirə bilmədi. Əvəzində topu ələ keçirən qapıçı Ramin Həsənzadə hücum quraraq fərqi artıran qolun müəllifi oldu. Həsənzadə 15-ci dəqiqədə yenidən hücuma qoşulmaqla dubl etdi. Ona qədər isə Asif rəqib torunu növbəti dəfə silkələmişdi. Fasiləyə 34 saniyə qalmış çempionatın ən məhsuldar oyunçusu Firudin Ağalarov Ramin Həsənzadəni məğlub etdi. Qeyd edək ki, bu futzalçı indiyə qədər qarşılaşdıqları bütün komandaların qapısına qol vurmaqla fərqlənib. İkinci hissədə də fərqi artıran “Marafon” mövsümdə 4-cü qələsini qazanıb.
“Bakı” – “Record club” oyunu da maraqlı keçdi. Xüsusilə də iranlı legionerlərə şans verən nominal qonaqlar daha təhlükəli olsa da, hesabı “Bakı” açdı. Ancaq Vüsal Buludlunun qazandırdığı üstünlük cəmi 25 saniyə çəkdi. Müdafiədə ani diqqətsizlik Matin Qaramaniyə bərabərlik qolunu vurmaq üçün kifayət etdi. “Record club” məhdud heyətlə oynamasına baxmayaraq, hesabı lehinə dəyişdi və fasiləyə üstün yollandı. İkinci hissədə də nominal qonaqlar fərqi artıran tərəf oldu. Xüsusilə də Sina Jamalinin oyununu qeyd etməyə dəyər.
Turun son matçında hesab erkən açıldı. Reza Tolouei yeni komandasında ilk qolunu vurdu. “Baku Fire”dən növbəti dəfə Rasif Səfiyarov fərqləndi. Yasamal futzalçıları fasiləyə 2 saniyə qalmış rəqib torunu silkələdi. Elgün Abbaslı adını tabloya yazdırdı.
İkinci hissə daha gərgin keçdi. Hətta texniki zona qaydalarını pozan “Baku Fire”in baş məşqçisi Teymur Eyvazov hakim tərəfindən meydandan kənarlaşdırıldı. Bir epizodda Rəvan Abdullayevin zərbəsindən sonra top qapı dirəyinə tuş gəldi. Renat Sultanovun fərqlənməsinə isə qapıçının göəl reaksiyası imkan vermədi. 30-cu dəqiqədə İbrahim-Reza-İbrahim paslaşmasını sonuncu qeyri-dəqiq zərbə ilə tamamladı. 35-ci dəqiqədə “Yasamal” İSK hesabı bərabərləşdirmək üçün yaratdığı fürsəti boşa verdi. Elşən Veysovun zərbəsini son anda Məlik Mirzəyev zərərsizləşdirdi. Əvəzində “Baku Fire” fərqi artırdı. Təcrübəli Renat Sultanov adını tabloya yazdırdı. İbrahim Zeynalov da sonrakı qolun müəllifi oldu.
“Xızı Futzal” – “Neftçi” İK (1:4) 5:9
21 noyabr. Bakı İdman Sarayı. Saat 12:00
Hakimlər: Xəlil Xəlilov, Ziya Nəsirov, Elman Musayev
Qollar: Elnur Soltanlı, 18:34, Şahin Əliyev, 25:46, Məhəmməd Xəlilov, 29:23, Xəyal Quliyev, 34:20 // Adil İsmayılov, 10:42, Vahib Xocayev, 12:47, 29:39, Emil Həsənzadə, 14:13, Oruc Baxşəlizadə, 15:34, 34:56, Oqtay Rüstəmli, 22:07, Tural İsmayılov, 25:28, Tofiq Hüseynov, 28:05
Sarı vərəqələr: Elnur Soltanlı, 30:41, Məhəmməd Xəlilov, 39:25
“Araz” – EKOL (3:0) 3:1
21 noyabr. Bakı İdman Sarayı. Saat 14:00
Hakimlər: Rahin Heybətov, Knyaz Əmiraslanov, Nahid Xasıyev
Qollar: Ramiz Çovdarov, 01:50, Murilo Borges Souza, 08:03, Xətai Bağırov, 09:01 // Radik Əhmədov, 39:42
Sarı vərəqələr: İsa Atayev, 02:53 // Namiq Məmmədkərimov, 27:42
“Premier” (Quba) – “Marafon” (2:5) 3:9
21 noyabr. Bakı İdman Sarayı. Saat 16:00
Hakimlər: Azər Əsgərov, Ceyhun Hüseynov, Vaqif Musayev
Qollar: Sabir Əlişan, 16:29, Firudin Ağalarov, 19:26, Vüqar Asalıyev, 23:13 // Asif Zeynalov, 08:04, 13:50, Ramin Həsənzadə, 10:09, 14:59, Tofiq Mikayılov, 16:50, 30:18, Seymur Məmmədov, 29:17, Elşən İbrahimxəlilov, 35:04, İlkin Hacıyev, 36:17
Sarı vərəqə: Firudin Ağalarov, 07:48
“Bakı” TFK – “Record club” (1:2) 3:4
21 noyabr. Bakı İdman Sarayı. Saat 18:00
Hakimlər: Anar Fərəcov, Fuad Həsənov, İsgəndər Əliyev
Qollar: Vüsal Buludov, 13:29, Zaur Fərziyev, 39:48, 39:59 // Matin Qaramani, 13:54, 26:39, Sina Jamali, 18:33, Sabir Hacıəliyev, 39:10
Sarı vərəqələr: Zaur Fərziyev, 19:56, Elvin Adışırinli, 30:06 // Sina Jamali, 18:33, Sabir Hacıəliyev, 37:28
“Yasamal” İSK – “Baku Fire” (1:2) 1:4
21 noyabr. Bakı İdman Sarayı. Saat 20:00
Hakimlər: Mehman Mahmudov, Elmir Quluzadə, Fuad Həsənov
Qollar: Elgün Abbaslı, 19:58 // Reza Tolouei, 01:17, Rasif Səfiyarov, 07:07, Renat Sultanov, 34:37, İbrahim Zeynalov, 35:23
Sarı vərəqələr: Elşən Veysov, 24:32, Vüsal Səfərov, 30:03 // İbrahim Zeynalov, 12:56
