Bu gün Yüksək Liqada X turun oyunları keçirildi. İkinci dövrənin ilk oyununda lider “Araz”la “Baku Fire” üz-üzə gəldi. Bu komandalar arasında keçirilmiş görüşdə “Araz” 4:1 hesablı qələbə qazansa da, debütant təcrübəli rəqibinə kifayət qədər həyəcanlı dəqiqələr yaşatmışdı. Bu dəfə isə hesab erkən açıldı. Hadi Ahmadi qapıçının təcrübəsizliyindən yararlandı. Ardınca “Araz”ın digər Hadisi qol sevinci yaşadı. Düzdü, nominal meydan sahibləri Rauf Rüstəmovla fərqi minimuma endirdi. Di gəl, Murilo yenidən rəqib torunu silkələməklə 2 toplu fərqi bərpa etdi. Buna qədər Rasif Səfiyarov status-kvonu bərpa etmək şansını qaçırdı. Fasiləyə qədər “Araz” fərqi bir qədər də artırdı. Yeri gəlmişkən, zədə üzündən Rizvan Fərzəliyev və Ramiz Çovdarov “Araz”a kömək edə bilmirdi. İkinci hissədə də komandalar hərəyə birinci hissədəki qədər qol vurdu. Turun mərkəzi oyununda “ilk 4-lüy”ə iddialı “Neftçi” və “Marafon” komandaları üz-üzə gəldi. CBC Sport televiziya kanalı vasitəsilə canlı yayımlanan görüşdə “Neftçi” cəzalı Rüfət Balakişiyevin və zədəli Elnur Zamanovun xidmətindən yararlana bilmirdi. “Marafon” isə Sadiq Cavidin yoxluğunu Aleksandr Dovqanla doldurmuşdu. İlk təhlükəli hücumu “Marafon” yaratdı. Seymur Məmmədovun zərbəsindən sonra top dirəyə dəyib geri qayıtdı. Ancaq 3-cü dəqiqədə pressinq tətbiq etməklə topu ələ keçirən nominal qonaqlar Borisovla hesabı açdı. Az sonra Məmmədov iki oyunçudan sıyrılıb qapıçı ilə üzbəüz qalsa da, yenə şansını qaçırdı. Elə rəqib “cəbhə”dən Kənan Manafov da “çərçivə”yə düşə bilmədi. Ardınca Baxşəlizadə Həsənzadəni məğlub edə bilmədi. Epizodların birində Oruc Tofiq Mikayılovun zərbəsindən sonra topu qapı xəttindən çıxardı. Fasiləyə 15 saniyə qalmış Borisov 10 metrlik zərbəni dəqiq yerinə yetirməklə fərqi 2 top çatdırdı. İkinci hissəyə nominal meydan sahibləri qolla başladı. Emil Həsənzadə fərqi minimuma endirməklə intiriqanı da artırdı. Ancaq Abdullazadənin yetirmələri 34-cü dəqiqədə yenidən rəqibin fərqlənməsinə üzüldü. Bu dəfə Məstiyev rəqib torunu silkələdi. Yekunda 3:1 hesabı ilə qalib gələn “Marafon” I dövrədəki yenilginin də revanşını almış oldu. EKOL - “Premier” duelində favorit qələbə qazandı. Hərçənd debütant təcrübəli rəqibinə kifayət qədər müqavimət göstərməyi bacardı. Növbəti oyun nominal qonaqların məhsuldarlığı ilə yadda qaldı. “Tələbələr” fasiləyə qədər 6 cavabsız top vurub. İkinci hissədə rəqibinə cəmi bir dəfə fərqlənmək imkanı verən “Bakı” TFK yekunda böyükhesablı qələbə qazandı. Turun son oyunu baş tutmayıb. “Xızı Futzal” təyin olunan vaxtda meydana çıxmadığına görə, nəticə ilə bağlı AFFA-nın İntizam Komitəsi qərar verəcək.
“Baku Fire” – “Araz” (1:5) 2:10
2 dekabr. Bakı İdman Sarayı. Saat 12:00
Hakimlər: Əli Cəbrayılov, Ziya Nəsirov, İsgəndər Əliyev
Qollar: Rauf Rüstəmov, 05:26, Reza Tolouei, 20:41 // Hadi Ahmadi, 01:25, Hadi Rezvan, 02:39, 25:52, Murilo Borges Souza, 09:44, 17:33, 26:44, Nihad İsmayılov, 16:35, 33:50, Xətai Bağırov, 36:28, Amir Shojaei, 37:51
Sarı vərəqələr: İbrahim Zeynalov, 29:13, Renat Sultanov, 31:05 // Xətai Bağırov, 13:10, Amir Shojaei, 25:02, Rövşən Hüseynli, 28:36
“Neftçi” İK – “Marafon” (0:2) 1:3
2 dekabr. Bakı İdman Sarayı. Saat 14:00
Hakimlər: Hikmət Qafarlı, Azər Əsgərov, Elmir Quluzadə
Qollar: Emil Həsənzadə, 21:44 // Vitali Borisov, 02:28, 19:45, Sərxan Məstiyev, 33:10
Sarı vərəqələr: Tural İsmayılov, 13:22, Adil İsmayılov, 25:32, Vahib Xocayev, 35:16
EKOL - “Premier” (Quba) (2:0) 4:1
2 dekabr. Bakı İdman Sarayı. Saat 16:00
Hakimlər: Ramiz Məhərrəmov, Rahin Heybətov, Fuad Həsənov
Qollar: Fərid Ələkbərov, 08:15, Talebmohammad Arabpour, 08:50, Namiq Məmmədkərimov, 25:15, Əsgər Abasov, 37:28 // Vüqar Asaliyev, 09:44
“Yasamal” İSK – “Bakı” TFK (0:6) 1:8
2 dekabr. Bakı İdman Sarayı. Saat 18:00
Hakimlər: Rahin Heybətov, Ceyhun Hüseynov, Mahir Məmmədov
Qollar: Əlimirzə Daşzərini, 26:20 // Fərid Səmədzadə, 02:50, Emin Abbasov, 03:50, 08:59, Elvin Adışırinli, 06:35, 16:34, 18:38, 27:11, Tural Lətifov, 31:58
Sarı vərəqələr: İbad Məmmədov, 22:08 // Məhəmməd Bədəlbəyli, 28:26
“Record club” – “Xızı Futzal”: “Xızı Futzal” komandası təyin olunmuş vaxtda meydana çıxmayıb.
2 dekabr. Bakı İdman Sarayı. Saat 20:00
Hakimlər: Ramil Namazov, Elvin Ağayev, Hacıəli Ağayev
