Bu gün Yüksək Liqada XIV tura start verildi. Turun ilk oyunu Qubada keçirildi. Azərbaycan Dövlət İqtisad Universitetinin İdman Kompleksində “Premier” lider “Araz”ı qəbul edirdi. İlk dəfə bölgədə keçirilən oyuna azarkeş marağı böyük idi. Kompleksin tribunaları tamailə dolmuşdu. Heyətlərə gəldikdə, “Araz” cəzalı Rövşən Hüseynlinin və icazəli Hadi Rezvanla Amir Shocajenin xidmətindən istifadə edə bilmirdi. “Premier” isə bir müddət idi komandadan ayrı düşən Tural Cəlilovu heyətə qaytarmışdı. CBC Sport kanalı ilə canlı yayımlanan oyundan əvvəl dövlət himni səsləndirildi. Görüşdə hesabı qonaqlar açdı. İsa Atayev rəqib qapısına yol tapdı. Cəmi bir dəqiqə sonra Alesionun “drujinası” fərqi 2 topa çatdırdı. Bu dəfə də Atayev qolun müəllifi oldu. Bir qədər sonra künc nöqtəsindən Murilonun ötürməsini Xətai Bağırov tora qovuşdurdu. Bundan sonra meydan sahibləri irəli atıldı. Azarkeşlərin dəstəyini qarşılıqsız buraxmayan Firudin Ağalarov çempionatda növbəti qolunu vurdu. Yeri gəlmişkən, Ağalarov cari mövsümün bütün oyunlarında fərqlənmiş yeganə futzalçıdır. Buraxılan qola rəğmən son çempion üstünlüyünü artırmağı bacardı. Növbəti dəfə Bağırov adının arenada səsləndirilməsinə nail oldu. “Premier” isə Ağalarov və Cəlilovla real qol şanslarından istifadə edə bilmədi. Əvəzində “Araz” fərqi artırdı. İkinci hissəyə meydan sahibləri qolla başladı. Asalıyev fərqi 3-ə endirdi. Ancaq ustalıq səviyyəsi nəticənin böyüməsinə də təsirsiz ötüşmədi. Nəticədə “Araz” fərqi artırdı. Ruhdan düşməyən meydan sahibləri qarşılıq verməyə çalışırdı. Təsadüfi deyil ki, əzmkarlıq hesabına “Premier” ikinci hissədə daha çox qol vurmağı bacardı. Di gəl, bu, məğlubiyyətdən qaçmaq üçün yetərli olmadı.
Premier (Quba) – Araz (2:6) 6:9
25 dekabr. Quba. ADİU-nun İdman Kompleksi. Saat 14:00
Hakimlər: Anar Fərəcov, Kənan Məlikov, Vüsal Balaşov
Qollar: Firudin Ağalarov, 05:08, Ağaseyid Qasımov, 18:58, Vüqar Asalıyev, 22:55, 39:00, Sabir Əlişan, 28:53, 31:28 // İsa Atayev, 02:10, 03:10, 19:40, Xətai Bağırov, 04:24, 07:32, 26:58, Nihad İsmayılov, 16:49, Murilo Borges Souza, 27:07, Hadi Ahmadi, 34:09
Sarı vərəqələr: Cavad Hacıyev, 37:14 // Rizvan Fərzəliyev, 33:21
Turun digər oyunları sabah keçiriləcək
Yasamal İSK – Xızı Futzal
26 dekabr. Olimpik Star. Saat 12:00
Hakimlər: Azad Hüseynov, Elman Musayev, İsgəndər Əliyev
Baku Fire – Neftçi İK
26 dekabr. Olimpik Star. Saat 14:00
Hakimlər: Əli Cəbrayılov, Ceyhun Hüseynov, Fuad Həsənov
Bakı TFK – Marafon
26 dekabr. Olimpik Star. Saat 16:00
Hakimlər: Hikmət Qafarlı, Nail Nğıyev, Xəlil Xəlilov
Record club – EKOL
26 dekabr. Olimpik Star. Saat 18:00
Hakimlər: Azər Əsgərov, Vaqif Musayev, Mahir Məmmədov
