Bu gün Yüksək Liqada XVIII turun oyunları keçirildi. İkinci dövrənin son turunun açılış matçı maraqlı alındı. Düzdü, EKOL cütün favoriti hesab edilsə də, “Xızı Futzal” kifayət qədər müqavimət göstərdi. İlk qolu “yaşıllar” vurdu. Samir Həmzəyevin qazandırdığı üstünlük 2 dəqiqə çəkdi. Əvəzində Xəyal və Fərid rəqib torunu silkələməklə hesabı komandasının xeyrinə dəyişdi. Fasiləyə 59 saniyə qalmış isə Faiq tablodakı rəqəmləri bərabərləşdirdi. Buna qədər Radiklə Oqtay qapı tirini nişan almışdı. İkinci hissəyə isə “Xızı Futzal” qolla başladı. Bu dəfə Xəyal Quliyev cərimə zərbəsini birbaşa qapıya istiqamətləndirdi ki, bu zaman İntiqam Babayevin inamsız oyunu topun tora daxil olması ilə nəticələndi. Faiq Əliyev növbəti dəfə status-kvonu bərpa etdikdən sonra komandalar hərəyə bir penaltidən qol sevinci yaşadı. EKOL-a 3 xal qazandıran qol isə matçın başa çatmasına 27 saniyə qalmış vuruldu. Turun ikinci oyunu məhsuldar alındı. Artıq 1 dəqiqənin tamamında “Marafon” rəqibini iki dəfə meydanın mərkəzinə dəvət etmişdi. Fasiləyə qədər 5 cavabsız top vuran Elşad Quliyevin drujinası ikinci hissədə də üstünlüyünü əldən vermədi. Növbəti dueldə “Baku Fire” ilk hücumdaca hesabı aça bilərdi. Renatın ötürməsini Tahir qapı çatına vurdu. “Bakı” Məhəmməd Bədəlbəyli ilə buna qarşılıq verdi. Bu dəfə qapıçı hesabın açılmasına imkan vermədi. Bununl belə, Bədəlbəyli istəyinə çatdı. Ancaq onun qazandırdığı üstünlük 1 dəqiqə çəkmədi, Renat status-kvonu bərpa etdi. Daha sonra Rasif Səfiyarov dubl etməklə 2 topluq fərq yaratdı. İkinci hissədə “Bakı” TFK daha çox qol vursa da, qələbəni nominal qonaqlar qazandı. “Premier” (Quba) oyuna gəlmədiyinə görə, “Neftçi” ilə qarşılaşma haqda İntizam Komitəsi qərar verəcək. Turun son oyunu liderin böyükhesablı qələbəsi ilə yekunlaşdı. Yüksək Liqada XIX turun oyunları martın 9-da “Olimpik Star”da keçiriləcək.
Saat 12:00 Xızı Futzal – EKOL (2:2) 5:6
Hakimlər: Əli Cəbrayılov, Etibar Həsənov, Elmir Quluzadə
Qollar: Xəyal Quliyev, 05:36, 21:15, 31:58, Fərid Abbaslı, 15:52, Şahin Əliyev, 27:20 (pen.) // Samir Həmzəyev, 03:23, Faiq Əliyev, 19:01, 26:30, Oktay Rüstəmli, 27:49 (pen.), 34:05, Əsgər Abasov, 39:33
Sarı vərəqələr: Elnur Soltanlı, 29:08 // Faiq Əliyev, 27:17
Saat 14:00 Yasamal İSK – Marafon (0:5) 1:9
Hakimlər: Anar Fərəcov, Fuad Həsənov, Ramil Namazov
Qollar: Almurad Həsənəliyev, 36:05 // Vitali Borisov, 0:37, 0:50, 12:46, Şahab Şahnazian, 02:36, Tofiq Məlikov, 19:22, 29:06, Majid Khazaei, 28:51, Elşən İbrahimxəlilov, 32:01, Sərxan Məstiyev, 39:40
Sarı vərəqə: Tofiq Məlikov, 24:50
Saat 16:00 Bakı TFK – Baku Fire (2:3) 5:6
Hakimlər: Rahin Heybətov, Ramiz Məhərrəmov, Fuad Həsənov
Qollar: Məhəmməd Bədəlbəyli, 02:45, 19:42, İlham Allahverdiyev, 25:33, 28:32, Tofiq Əliyev, 38:15 // Renat Sultanov, 03:17, 28:45, Rasif Səfiyarov, 09:36, 14:36, Asif Zeynalov, 32:48, 39:43
Sarı vərəqələr: Məhəmməd Xəlilov, 19:02 // Asif Zeynalov, 38:58
Saat 18:30 Araz – Record club (5:0) 8:2
Hakimlər: Knyaz Əmiraslanov, Elvin Ağayev, Vüsal Balaşov
Qollar: Murilo Borges Souza, 04:23, Hadi Əhmədi, 08:10, Ramiz Çovdarov, 10:39, Xətai Bağırov, 14:08, 17:23, 27:15, 38:06, Sunay Həsənov, 31:09 // Matin Gahramani, 31:42, Babakhani Chiya, 34:16
