Bu gün millimiz Minskdəki təlim-məşq toplanışı çərçivəsində ilk yoldaşlıq oyununu keçirib. Komandamız Belarus yığması ilə qarşılaşıb. Zədəli olduğuna görə Fineo, eləcə də Kardoso Everton və Amadeu Minskə yollanmamışdı. MAPİD İdman Kompleksində keçirilmiş oyuna Alesio bu “5-liy”i buraxıb: Rövşən Hüseynli, Rizvan Fərzəliyev, Vitali Borisov, Teles Thaqo və Sezar Conatan. Rəqibin heyətində isə tanış sima var idi. İki ilə əvvəl “Marafon Futsal”ın formasını geyinmiş Jarikov bu dəfə milli komandasına kömək edirdi. Oyun meydan sahiblərinin nisbi üstünlüyü ilə başlasa da, qapıya ilk təhlükəli zərbə 2-ci dəqiqədə Sezar Conatandan gəldi. İsa Atayevin zərbəsini isə qapıçı kornerə çıxardı. Əvəzində kornerdən oyuna daxil edilən topu Xətai qarşısıalınmaz zərbə ilə tora qovuşdurdu. Ancaq hesabdakı üstünlüyümüz cəmi 10 saniyə çəkdi. 7-ci dəqiqədə Rövşən Alenin hesabı xeyirlərinə dəyişməsinə imkan vermədi. Ancaq 11-ci dəqiqədə Anton Qusakovun zərbəsi dəqiq oldu və meydan sahibləri hesabı xeyrinə dəyişdi. Təxminən dəqiqəyarımdan sonra Yevdokimov komanda yoldaşının zərbəsinə bənzər dəqiq zənbə endirdi. Vitalinin topu rəqib müdafiəçinin başı üzərindən aşırıb fərqi azaltdığı epizodda isə yerli azarkeşlərin baxımlı qol vurduğuna görə futzalçımızı alqışladı. İkinci hissəyə rəqib qolla başladı. 23-cü dəqiqədə fərq iki topa çatdı. Ardınca Xətainin zərbəsi dirəkdən geri döndü. Artıq əsəbləri tarıma çəkilən millinin üzvləri ardıcıl sarı vərəqələr almaqla yadda qaldı. Rəqib isə futzalçılarımızın təzyiqinə baxmayaraq, 31-ci dəqiqədə fərqi 3 topa çatdırdı. 35-ci dəqiqədə Vitalinin qüvvətli zərbəsini Yevqeni çətinliklə geri qaytardı. Qapıçını da meydan oyunçusu ilə əvəzləyən Alesio az qala 36-cı dəqiqədə meydan sahiblərinin boş qapını nişan almasına şahid olacaq. Son anda özünü topa çatdıran İsa hesabın dəyişməsinə imkan vermədi. Sona 40 saniyə qalmış millimiz fərqi 2 top endirdi. Ramiz Çövdarov oyunda son nöqtəni qoydu.

Belarus – Azərbaycan 5:3 (3:2)

Beynəlxalq yoldaşlıq oyunu

26 avqust. Minsk. MAPİD İdman Kompleksi. Saat 19:30

Hakimlər: Vitali Rakuçki, Anton Jdanoviç, Serqey Tixinoviç (hamısı Belarus)

Qollar: S. Silivonçik, 05:17, A. Qusakov, 10:11, 30:36, M. Yevdokimov, 11:57, V. Selyuk, 22:52 // X. Bağırov, 05:07, V. Borisov, 15:49 , R. Çovdarov, 39:20

Sarı vərəqələr: P. Raqovik, 24:12 // R. Hüseynli, 14:19, X. Bağırov, 22:52, T. Thaqo, 27:08

Belarus

16. Yevqeni Zmıslya (q), 2. Aleksandr Olşevski (k), 9. Ruslan Lazyuk, 11. Vladimir Zinalka, 15. Alen Harbenka, 12. Artem Petuxov (q), 3. Anton Matveenko, 4. Serqey Silivonçik, 5. Vladislav Selyuk, 7. Pavel Raqovik, 8. Denis Kolb, 10. Vasili Jarikov, 13. Maksim Yevdokimov, 14. Anton Qusakov, 17. Dmitri Şvedko

Baş məşqçi: Aleksand Savinçev

Azərbaycan

12. Rövşən Hüseynli (q), 3. Teles Thaqo, 8. Rizvan Fərzəliyev (k), 14. Vitali Borisov, 16. Sezar Conatan, 1. Emin Kürdov (q), 7. Ramiz Çovdarov, 9. Oktay Rüstəmli, 10. Nihad İsmayılov, 11. Xətai Bağırov, 17. İsa Atayev, 5. Fərid Atakişiyev

Baş məşqçi: Joze Alesio Da Silva