Avropa çempionatının seçmə qrup mərhələsi çərçivəsində bu gün son oyununu keçirən millimiz Yunanıstan yığması ilə qarşılaşıb. Bakı İdman Sarayında keçirilən oyunda Slovakiya ilə dueldə meydana çıxmayan Hadi Ahmadi və Tyaqo da iştirak edirdi. Millimiz qrup liderliyini və avtomotik olaraq Avropa çempionatının final mərhələsinə vəsiqəni təmin etdiyinə görə, dueldə qazanılacaq qələbə ancaq reytinq əmsallarına təsir edəcəkdi. Onu da qeyd edək ki, qrupumuzun autsayderi olan Yunanıstan mübarizəyə ilkin mərhələdən başlayıb və əsas mərhələdə ilk xalını bir neçə gün öncə Moldova ilə görüşdə qazanıb. Komandamızın rəqiblə bu il keçirilən ilk duel isə fevralda Afinada baş tutub və 3:0 hesablı qələbəmizlə yekunlaşıb. Alesio Slovakiyaya qarşı meydana buraxdığı “4-lüy”ə güvənsə də, qapını Emin Kürdova tapşırmışdı. İlk dəqiqədən üstünlüyü əldən verməyən millimiz 3-cü dəqiqədə Fineo ilə hesabı açdı. Növbəti zərbə Qalodan gəldi. Amma müdafiəçinin təhlükəli zərbəsi qeyri-dəqiq oldu. 6-cı dəqiqədə rəqibin heyətində Karavidas çərçivə istiqamətində zərbə vursa da, top dirəyin yanından keçdi. Ona cavab olaraq İsa Atayev fərqi artırmağa yaxın oldu. Hücumçunun zərbəsini qapıçı dəf etməklə hesabı qorudu. Amir də “ev tapşırığı”nı yerinə yetirən zaman toru nişan aldı. 10-cu dəqiqədə isə Yunanıstan yığması ən real qol epizodunu yaratsa da, Karavidas çərçivəni “itirdi”. Fineo-Edu paslaşmasını isə kapitan məntiqi sonluğa çatdıra bilmədi. Əvəzində 14-cü dəqiqədə hesab dəyişdi. Amirin vurduğu topu Zervas geri qaytarsa da, “mərmi” Gousisə dəyib qapıya daxil olur. Qüvvətli zərbələri ilə rəqib qapıçıları üçün arzuolunmaz hesab edilən Atayev qonaq qolkiperə də rahatlıq vermirdi. 16-cı dəqiqədə müdafiədə topu qəbul edən İsa 3 rəqibini zərərsizləşdirərək hesabı da dəyişdi – 3:0. İkinci hissənin əvvəlində qonaqlar müdafiədə səhvə yol verdi. Topa sahib olan Amir onu qapıçının yanından çərçivəyə göndərsə də, “mərmi” dirəyə tuş gəldi və geri qayıtdı. 25-ci dəqiqədə qonaqlar yenidən mərkəzə dəvət olundu. Bu dəfə Atayevdən əla ötürmə alan Çovdarov adının idman sarayında səsləndirilməsinə nail oldu. Növbəti hücum zamanı top qapı çatına dəydi. Nəticədə Eduardonun zərbəsindən sonra qapı xəttin üzərindən geri sürüşdü. Edu bir qədər sonra Bolinha üçün assistentlik etsə də, sonuncunun zərbəsini qolkiper kornerə çıxardı. Kürdov da boş dayanmırdı. Kondylatosun 29-cu 38-ci dəqiqələrdə fərqi azaltmasına imkan vermədi. Son 3 dəqiqə qalmış isə qapıçı Cavad Məmmədov meydana daxil olmaqla milli komandada ilk oyununa çıxmış oldu. Yekunda 4:0 hesabı ilə qələbə qazanan millimiz seçmə mərhələni 3 xalla yekunlaşdırmış oldu.

Azərbaycan – Yunanıstan (3:0) 4:0

14 aprel. Bakı İdman Sarayı. Saat 19:00

Hakimlər: Yaroslav Vovçok (Ukrayna), Yevhen Hordiienko (Ukrayna), Knyaz Əmiraslanov (Azərbaycan)

Timekeeper: Hikmət Qafarlı (Azərbaycan)

Hakim-inspektor: Andreas Demetriou (Kipr)

UEFA nümayəndəsi: Sergey Lisençuk (Ukrayna)

Qollar: Fineo De Araujo, 02:14, Gousis Panagiotis, 13:10 (ö/q), İsa Atayev, 15:23, Ramiz Çovdarov, 24:03

Sarı vərəqə: Edurardo Borges, 16:17

Azərbaycan

1. Emin Kürdov (GK), 6. Eduardo Borges, 8. Rizvan Fərzəliyev (K), 13. Qalo, 16. Fineo De Araujo, 12. Rövşən Hüseynli (GK), 19. Cavad Məmmədov (GK), 3. Bolinha, 5. Amir Shojaei, 11. Xətai Bağırov, 17. İsa Atayev, 7. Ramiz Çovdarov, 14. Hadi Ahmadi, 20. Tofiq Mikayılov

Baş məşqçi: Joze Alesio Da Silva

Yunanıstan

12. Dimitris Zervas (GK, K), 2. Spyridon Kondylatos, 3. Dimitrios Karavidas, 4. Gousis Panagiotis, 16. Marios Ntatis, 1. Theofilou Dimitrios (GK), 5. Floros Acxilleas, 6. Çaralampos Stavrakopoulos, 7. Andreas Tarnanidis, 8. Papakostas Spyridon, 9. İoannis Delaportas, 11. Apostolos Gkaifyllias, 10. Spyridon Papadopoulos, 15. Dimitrios Karydas

Baş məşqçi: Giannis Ziavas