Bu gün Avropa çempionatının final mərhələsində Azərbaycan millisi ilk oyununu keçirib. D qrupunun açılış qarşılaşmasında komandamız Gürcüstan yığması ilə üz-üzə gəlib. Bir gün əvvəl COVİD-19-la bağlı verdiyi testi pozitiv çıxan Rövşən Hüseynli və Qallo bu dəfə komandadan kənarda qalmışdı. Əlbəttə, vacib oyun ərəfəsində düşərgədə bu cür itkilərin baş verməsi futzalçılara psixoloji baxımdan təsir etməyə bilməzdi. Oyuna gəldikdə, hesabı Vilela açdı. Fineonun ötürməsini forvard tora qovuşdurdu. O, 1 dəqiqə sonra cərimə zərbəsindən birbaşa qapıya yol tapmaqla üstünlüyümüzü iki topa çatdırdı. Elisandro 10-cu dəqiqədə fərqi minimuma endirdi. Bu, həm də birinci hissədə vurulan sonuncu qol oldu. 26-cı dəqiqədə Fineonun zərbəsini qapıçı son anda kənarlaşdıra bildi. Bir dəqiqə sonra topu uzaqlaşdıran zaman komandamız səhvə yol verdi ki, rəqib də bundan maksimum yararlandı və hesabı bərabərləşdirdi. Debütanlar oyunda ilk dəfə 32-ci dəqiqədə üstünlük qazandı. Penaltini Thales yerinə yetirdi. Qeyd edək ki, millimiz 6-cı, Gürcüstan yığması isə ilk dəfə final mərhələsində iştirak edir.
Gürcüstan – Azərbaycan (1:2) 3:2
Avropa Çempionatının final mərhələsi
22 yanvar. Qroningen, Martini Plaza. Saat 17:30
Hakimlər: Cedric Pelissier (Fransa), Daniel Matkovic (İsveçrə), Nikola Jelic (Xorvatiya)
Timekeeper: Vedran Babic (Xorvatiya)
Qollar: Elisandro, 9:31, Arçil Sebiskveradze, 26:54, Thales Feito, 31:30 (pen.) // Rafael Vilela, 5:14, 6:26
Sarı vərəqələr: Roninho, 9:35 // Fineo De Araujo, 8:07, Rizvan Fərzəliyev, 16:43, Felipinyo, 19:35, Bolinha, 31:53
Gürcüstan
1. Zviad Kupatadze (q, k), 2. Çaguinha, 10. Roninho, 16. Thales Feito, 19. Elisandro, 12. Tornike Bukia (q), 20. Petri Branko, 6. Villian Lourenço, 9. İrakli Todua, 7. Şota Topuriya, 17. Arçil Sebiskveradze, 18. Nikoloz Kurtanidze, 5. Giorgi Qavtadze, 8. Vaxtanq Kekeliya
Baş məşqçi: Avtandil Asatiani
Azərbaycan
1. Emin Kürdov (q), 6. Eduardo Borges, 2. Felipinyo, 3. Bolinha, 10. Vassoura, 8. Rizvan Fərzəliyev (k), 5. Fineo De Araujo, 7. Ramiz Çovdarov, 11. Xətai Bağırov, 17. İsa Atayev, 14. Hadi Ahmadi, 9. Rafael Vilela
Baş məşqçi: Joze Alesio Da Silva
