Avropa çempionatının ilkin mərhələsi çərçivəsində bu gün 19 yaşadək futzalçılardan ibarət Azərbaycan millisi B qrupunda ilk oyununu keçirdi. Görüşə futzalçılarımız aktiv başlasa da, hesabı rəqib açdı. Amma ruhdan düşməyən komandamız hissənin tamamına 3 dəqiqə qalmış hesabı bərabərləşdirdi. Ədalətin zərbəsindən sonra dirəyə dəyib geri qayıdan topu Hüseyn rəqib toruna qovuşdurmaqla fasiləyə “sülh”lə yollanmağımızı təmin etdi. İkinci hissədə millimiz demək olar ki, rəqibə meydanın mərkəzini keçmək imkanı vermədi. 23-cü dəqiqədə Ədalət bu dəfə özü fərqlənməklə komandamıza üstünlük qazandırdı. Ələkbərovun növbəti dəfə fərqlənməsinə qapı tiri mane oldu. 30-cü dəqiqədə futzalçılarımız 5 cərimə foulu limitini doldursa da, rəqib qapısını növbəti dəfə nişan almağı da bacardı. Bu dəfə Rəvan Məsiyev adını tabloya yazdırdı. 35-ci dəqiqədə Ədalətə qarşı növbəti ədalətsizlik oldu. Bu dəfə də onun zərbəsi dirəkdən geri qayıtdı. Artıq qapıçını da meydan oyunçusu ilə əvəzləyən Kosovo yığması növbəti dəfə meydanın mərkəzinə dəvət olundu. Ədalət bu dəfə boş qapıya düşməklə dubl etdi. Oyunu əvəzolunmadan keçirən qapıçı Əli Həsənzadə də inamlı çıxışı ilə qələbədə vacib pay sahibi oldu. İnamlı qurtarışları ilə alqış qazanan qolkiper 37-ci dəqiqədə rəqibin 10 metrlik zərbəsini də dəf etməklə fərqin azalmasına imkan vermədi. Beləliklə turnirə qələbə ilə start verən futzalçılarımız bununla yeni səhifə də açmış oldu. Belə ki, buna qədər xal qazana bilməyən U-19 ilk dəfə meydanı qalib tərk etməklə növbəti mərhələyə yüksəlmək şansını da xeyli artırmış oldu. Komandamız növbəti oyununu sabah – yanvarın 26-da San Marinoya qarşı keçirəcək. Görüş Bakı vaxtı ilə saat 21:00-da başlayacaq.

Azərbaycan – Kosovo (1:1) 4:1

Avropa çempionatı. İlkin mərhələ

25 yanvar. Serravalle. Multievent Sport Domus. Saat 21:00

Hakimlər: Radim Cep (Çexiya), Adam Czene-Joo (Macarıstan), Jiri Bergs (Belçika)

Hakim-inspektor: Stefan Veber (Almaniya)

UEFA nümayəndəsi: Maria Mayans (İspaniya)

Timekeeper: Laurentiu İlie (San Marino)

Qollar: Hüseyn Cəfərzadə, 17:39, Ədalət Ələkbərov, 22:22, 35:47, Rəvan Məsiyev, 31:34 // Valmir Musoli, 5:12

Sarı vərəqələr: Ümüd Qəhrəmanov, 12:59, Pünhan Qasımzadə, 28:30, Ədalət Ələkbərov, 28:51, Bəyoğlan Vəlizadə, 37:07  // Donart Sila, 8:58, Hasani Hisen, 14:02

Azərbaycan

12. Əli Həsənzadə (q), 5. Rəvan Məsiyev, 7. Ədalət Ələkbərov, 10. Nazim Hüseynov, 14. Rəvan Quliyev, 1. Hüseyn Əbdülov (q), 2. Umud Qasımov, 6. Oqtay Mahmudzadə, 8. Hüseyn Cəfərzadə, 9. Pünhan Qasımzadə (k), 11. Bəyoğlan Vəlizadə, 13. Ümüd Qəhrəmanov

Baş məşqçi: İlqar Aslanov

Kosovo

1. Lorind Kadriu (q), 7. Erjon Jaşaniça (k), 8. Engjell Mehmeti, 9. Valmir Musoli, 10. Donart Sila, 12. Alton Buguyevçi (q), 3. Lis Berişa, 4. Lision Mehmeti, 5. Hasani Hisen, 6. Ermal Sadiku, 11. Fatos Musliu, 13. Yll Abazi

Baş məşqçi: Suad Keçi