Final mərhələsi 2020-ci ildə Litvada keçiriləcək dünya çempionatının əsas mərhələsindən mübarizəyə başlayacaq millimizin rəqiblərindən biri də müəyyənləşib.

Belə ki, ilkin mərhələdə mübarizə aparan Moldova yığması bir qədər əvvəl həlledici qarşılaşmada Finlandiya ilə qarşılaşıb və 2:1 hesabı ilə qələbə qazanıb. Qrup oyunlarına evsahibliyi edən moldovalılar fasiləyə qədər bir qol vurub. Təşkilatçı ölkənin yığması ikinci hissənin əvvəlində fərqi 2 topa çatdırsa da, skandinaviyalılar 44 saniyədən sonra rəqib torunu silkələyib. Nəticədə 9 xal toplayan Moldova H qrupunun lideri kimi əsas mərhələyə yüksəlib. Əvvəlcədən də xəbər verdiyimiz kimi, məhz bu qrupun lideri millimizlə bir qrupda yer alacaq. Qrupun formal xarakter daşıyan oyununda isə Uels Şimali İrlandiyanı yenib – 3:2.

Qeyd edək ki, əsas mərhələnin oyunları bu il oktyabrın 22-dən 27-dək keçiriləcək. Yığmamızın yer aldığı qrupun oyunları Bakı İdman Sarayında baş tutacaq.