19 yaşadək futzalçılardan ibarət Azərbaycan və Türkiyə yığmaları arasında bu gün keçirilmiş yoldaşlıq oyunundan sonra hər iki komandanın baş məşqçisinin səsləndirdiyi fikirləri diqqətinizə çatdırırıq:

Ağatahir Əzimov (Azərbaycan yığma komandasının baş məşqçisi): “Çox pis oynadıq. Rəqibdən çəkindik,  sanki dogma meydanda oynayan biz deyildik. Məşqdə etdiklərimizi oyunda göstərə bilmədik. Razıyam, fiziki cəhətdən rəqibdən geri qalırıq. Ancaq verdiyim tapşırıqları da uşaqlar tətbiq edə bilmədilər. Seçim imkanımız məhduddur”.

Murat Kaya (Türkiyə yığma komandasının baş məşqçisi): “Birinci oyunda müdafiədə müəyyən səhvlərə yol vermişdik. Dünən məşq zamanı onları düzəltməyə çalışdıq. Bilirdik ki, rəqibimiz əsas standart vəziyyətlər zamanı təhlükəli olur. Bu dəfə səhvsiz oynadıq, sürəti artırmağa çalışdıq. Göstərdiyiniz qonaqpərvərliyə, diqqətə görə təşəkkürümüzü bildiririk. Bizim üçün faydalı oyunlar oldu”.