AZƏRBAYCAN KUBOKU
-
Azərbaycan kuboku, 1/16 final, Cavab oyunları (fotoreportaj-3)
-
NTD-yə 4 saniyə şoku
Bu gün “Olimpik Star”da keçirilən 6 oyunla Azərbaycan kubokunun 1/16 final mərhələsinin cavab oyunlarına yekun vuruldu. “Standard” bu dəfə minimalhesablı qələbəyə sevindi. “Badamlı” – “Forza Neftçi” oyunu isə gərgin keçdi. “Forza” görüşün əvvəlində müqavimət göstərsə də, İrandan dəvət olunmuş legionerlərlə güclənmiş Naxçıvan təmsilçisi üstünlüyünü sona qədər qorudu. Elə növbəti matçda da mərhələni Bakıya təşrif buyurmuş qonaqlar qazandı. “Bakı” ilə 1:1 hesablı duelin revanşında “Nəqşicahan” qələbəni aktivinə yazdırdı və “Baku Fans”ın rəqibi oldu. NTD – EKOL duelinin ilk matçında qeydə alınan nəticə nə qədər gözlənilməz olsa da, kubokun son sahibi titulunu itirməklə barışmaq fikrində deyildi. Bunun üçün 5 top fərqli qələbə qazanmaq gərəkirdi ki, 18-ci dəqiqədə EKOL rəqibindən 3 top çox vurmuşdu. Üstəlik, Yüksək Liqa təmsilçisi dördücü qolu bir nəfər azlıq qalan zaman rəqib qapısından keçirdi. EKOL-a mübarizəni davam etdirmək hüququ verilən qol isə görüşün başa çatmasına 4 saniyə qalmış vuruldu. Fərid Atakişiyev görüşün qəhrəmanı oldu.
“Atletiko Baku” – “Yasamal” İSK ilk oyunda məhsuldar heç-heçə etdiyindən, cavab oyununa maraq az deyildi. Elə qollarda qarşılıqlı sıralama şəklində vurulurdu. Tədricən üstünlüyünü artıran “Atletiko Baku” qalib gəldi. Son qarşılaşmada isə “Avdokat” rəqibindən güclü oldu. “Vəkillər” böyükhesablı qələbə sayəsində Yüksək Liqanın ortabablarından “Baku Fire”i mübarizədən kənarlaşdırdılar.
-
Azərbaycan kuboku, 1/16 final, cavab oyunları (fotoreportaj-2)
-
Red Line, Star kargo-2, Neftçi, Araz və Hövsan...
Bu gün “Olimpik Star”da Azərbaycan kubokunun 1/16 final mərhələsi çərçivəsində növbəti 5 oyun keçirildi. Günün ilk matçı kifayət qədər maraqlı və gərgin keçdi. Buna da səbəb ilk duelin minimalhesablı fərqlə başa çatması idi. Görüşə “Borçalı” fəal başladı və hesabı açan tərəf oldu. Ancaq üstünlüyünü qorumağı bacarmayan nominal meydan sahiblərinin hətta 2 üzvü qırmızı fərəqə alaraq meydanı erkən tərk etdi. Yekunda yenə minimalhesablı qələbə qazanan Red Line 1/8 finala vəsiqə qazandı. “Star kargo”ların duelində isə böyük futboldan tanıdığımız simalar iştirak edirdi. “İkincilər”də Ramal və Zeynalabdin Hüseynov qardaşları, eləcə də Ramazan Abbasov bu dəfə parket iş başında oldular. İlk oyunda olduğu kimi, bu dəfə də İkinci Liqa komandası qələbə qazandı.
İlk oyunda 10 cavabsız topla rəqibini məğlub edən “Neftçi” cavab qarşılaşmasında daha çox qol vurmaqla, üstəlik qapısını toxunulmaz saxlamaqla mərhələ adlayan tərəf oldu. “Araz” isə cütün taleyini ilk oyunda həll etdiyindən cavab oyunu formallığa çevrilmişdi. “Baker Hughes” bu dəfə də böyük hesabla yenililsə də, rəqibinə qarşı kifayət qədər müqavimət göstərməyə çalışdı. Xüsusilə də həvəskar komanda birinci hissədə buna daha çox nail oldu. Günün son duelində isə “Hövsan” növbəti mərhələyə vəsiqə qazandı. Nominal meydan sahibləri hər iki oyunda Yüksək Liqa təmsilçisindən üstün olmaqla bunu bacardı.
-
Azərbaycan kuboku, 1/16 final: Cavab oyunları (fotoreportaj-1)
-
1/8 finalçılardan 5-i müəyyənləşdi
Bu gün Azərbaycan kubokunun 1/16 final mərhələsinin cavab oyunları çərçivəsində 5 qarşılaşma keçirildi. Günün ilk oyununda Yurd MFK və Yasamal İSK-2 üz-üzə gəldi. İlk oyundakı sürüşkən hesab görüşün daha gərgin keçəcəyinə işarə etsə də, nominal meydan sahibləri fərqli hesabla qələbəni bayram etdi. Günün ikinci oyunu daha gərgin keçib. “Bibi-Heybət” hesabda iki dəfə önə keçsə də, üstünlüyünü sona qədər qoruya bilmədi, son dəqiqədə isə məğlub duruma düşdü. Düzdür, Balarzanın qolu ilə status-kvo bərpa olundu. Amma ilk oyunda qalib gələn Quba futzalçıları mübarizəni davam etdirən tərəf oldu. Altay – Marafon duelində isə hesab 10-cu dəqiqədə açıldı. Yüksək Liqa təmsilçisi sükutu pozan tərəf oldu. Fasiləyə qədər üstünlüyünü artıran Marafon ikinci hissədə də qolları sıraladı. Xızı Futzal komandası təyin olunan vaxtda meydana çıxmadığına görə, nəticə ilə bağlı İntizam Komitəsi qərar verəcək. Günün son matçında Zəngilan qələbə qazansa da, ilk dueldəki böyükhesablı qələbə sayəsində mərhələni Baku Fans adladı.
-
Bu gün, Azərbaycan kuboku,1/16 final mərhələsi: Cavab oyunları
Bu gün Azərbaycan kubokunun 1/16 final mərhələsinin cavab oyunlarına start veriləcək. “Olimpik Star”da gün ərzində 5 qarşılaşma keçiriləcək. Şənbə və bazar günləri isə müvafiq olaraq 5 və 6 qarşılaşma baş tutacaq.
-
Azərbaycan kuboku,1/16 final mərhələsi: Təyinatlar
Azərbaycan kubokunun 1/16 final mərhələsinin cavab oyunlarına təyinatlar açıqlanıb.
